بيومي فؤاد يكشف عن نصيحة الزعيم عادل إمام له

تحدث الفنان بيومي فؤاد عن نصيحة الفنان عادل إمام له، وعن كيفية تحقيقه لهذه النصيحة.

وقال بيومي فؤاد أثناء استضافته في حلقة خاصة مع الإعلامي شريف عامر في برنامجه "يحدث في مصر": "الأستاذ عادل إمام لما قعد معايا قالي: «خلي لا عندك في قوة أه»، فأنا مش عارف أقول لا أصلًا".

وتابع: "أصل هقول إيه لواحد جاي بيحلف لي أنه خد قرض عشان يعمل الفيلم ولو متعملش هيتخرب بيته.. وأقوله السيناريو وحش، يقولي عدل السيناريو زي ما أنت عايز أصل التوزيع بيستعجلني أوي".

وأضاف: "وبعدين اكتشفت إن فيه حد بيجبني يوم على أني ضيف شرف وبعدين اتفاجئ أني أحد أبطال الفيلم، وساعات بنروح نجامل في تصوير اليوم الواحد ومبرضاش أخد أجر، ويفضل المنتج يصرعلي فأقول إيه الراجل الكريم ده؟ ودايماً بيبقى اعتذاري بجملة معنديش وقت لان لو جيه الورق واتكلمنا في فلوس هيبقى بيومي بيعتذر عشان مش عاجبه الورق أو الفلوس، فبقول معنديش وقت، واللي بيكلموني دلوقتي بقولهم نتكلم بعد رمضان بساعة".